1993-cü ildən bəri Yer kürəsi təqribən 80 santimetr əyilib - Tədqiqat

Əriyən buzlaqlar və tükənən yeraltı sular dəniz səviyyəsini qaldırır. Alimlər tərəfindən aparılan bir araşdırma suyun yenidən bölüşdürülməsinin Yer kürəsinin fırlanma oxunu da dəyişdirdiyini göstərib.

Avtosfer.az xarici mediaya istinadla xəbər verir ki, beynəlxalq tədqiqatçılar qrupu 1993-2010-cu illər arasında Yer kürəsinin fırlanma oxunun təxminən 78,48 santimetr dəyişdiyini aşkar edib. Bu dəyişiklik qismən suvarma və içməli su üçün yeraltı ehtiyatların çıxarılması ilə bağlıdır.

İqlim modelinin hesablamalarına görə, həmin dövrdə (1993–2010) yeraltı suların ümumi tükənmə həcmi 2150 giqatona çatıb. Bu, dəniz səviyyəsinin 6,24 millimetr artmasına bərabərdir.

Tədqiqatın aparıcı müəllifi, Seul Milli Universitetinin geofiziki Seo Ki-von izah edib ki, yeraltı suların yenidən bölüşdürülməsi hazırda digər iqlim amilləri ilə müqayisədə qütb sürüşməsinə ən böyük təsir göstərir. Beləliklə, Yer kürəsinin fırlanma qütbündəki dəyişiklikləri müşahidə etmək su ehtiyatlarının kontinental miqyasda necə dəyişdiyini anlamağa imkan verir. Ekoloqlar və su ehtiyatları menecerləri dəniz səviyyəsinin daha da qalxmasını və digər iqlim təsirlərini məhdudlaşdırmaq üçün bu məlumatlardan istifadə edərək tədbirlər hazırlaya bilərlər.