Alimlər koronavirusun insan yaddaşını necə "oğurladığını" açıqladı

Kaliforniya Universitetinin Devis kampusundan olan alimlər müəyyən ediblər ki, SARS-CoV-2 virusu beyinə sürətlə nüfuz edərək Altsheymer xəstəliyinin əlamətlərinə bənzər pozuntular yarada bilir. Avtosfer.az "Qaynarinfo"ya istinadən xəbər verir ki, bu barədə "Genomic Press" jurnalında dərc olunmuş araşdırmada qeyd olunub. Tədqiqat çərçivəsində alimlər COVID-19-dan vəfat etmiş şəxslərin retina toxumalarını və həmçinin kök hüceyrələrdən yetişdirilmiş laboratoriya retina orqanoidlərini təhlil ediblər. Xüsusi diqqət virusun hüceyrələrə daxil olmaq üçün istifadə etdiyi iki zülala - neyropilin-1 (NRP1) və ACE2-yə yönəldilib. Aparılan analiz göstərib ki, NRP1 zülalı COVID-19-a yoluxmuş şəxslərin neyron və gliya hüceyrələrində aktiv şəkildə mövcuddur. Bu fakt virusun, o cümlədən gözlər vasitəsilə beyinə daxil ola bilməsi ilə bağlı hipotezanı təsdiqləyir. Üstəlik, COVID-19-dan əvvəl demensiya əlamətləri olmayan şəxslərdə belə xəstəlikdən sonra neyrodegenerativ dəyişikliklərlə əlaqəli olan beta-amiloid adlı zülalın çöküntüləri aşkarlanıb. Araşdırma həmçinin göstərib ki, NRP1-i bloklayan preparat əlavə edildikdə beta-amiloidin toxumalardakı konsentrasiyasının artımı dayandırılır. Alimlərin sözlərinə görə, bu müşahidə COVID-19-dan sonra bəzi insanlarda müşahidə olunan "beyin dumanı" və digər nevroloji fəsadların qarşısını ala biləcək yeni müalicələrin hazırlanmasına yol açır.