ChatGPT-nin köməyi ilə məhkəmədə qalib gəldi

Odessada yaşayan bir qadın süni intellektdən istifadə edərək məhkəməni necə qazandığını və min dollar qənaət etdiyini danışıb. Avtosfer.az Lent.az-a istinadən xəbər verir ki, Odessalı Aleksandra Korin hüquqşünas xidmətlərinə pul xərcləməmək üçün ChatGPT-dən istifadə edib və məhkəmə mübahisəsini özü həll edib. O, iddia ərizəsini süni intellektin köməyi ilə hazırlayıb və “Elektron məhkəmə” sistemi ilə işləməyi öyrənib. Xərci yalnız ChatGPT abunəsinə və məhkəmə rüsumuna çıxıb.

Lakin o etiraf edir ki, bu, heç də asan olmayıb:

“Bu, həqiqətən də çox böyük bir iş idi: uşağım yatandan sonra oturub bunu edirdim. Süni intellekt mənə elektron məhkəmə vasitəsilə müraciət edə biləcəyimi dedi. İlk cəhdim uğursuz oldu. Sənədlərdə bəzi səhvlər aşkarlanandan sonra məhkəmə işi geri qaytardı. Lakin mən səhvləri düzəldib yenidən göndərdim və hakimin qərarı xeyrimə oldu. Məhkəmədə iddianın süni intellektin köməyi ilə tərtib edildiyini bilmirdilər. Bununla belə, bu barədə hər hansı qadağa olmadığını qeyd etdilər”.