Dünya nəhəngləri süni intellektə yatırımları artırmaq üçün əməkdaşlığa başlayır – BƏYANNAMƏ İMZALANDI

Fransanın paytaxtı Parisdə keçirilən Beynəlxalq Süni İntellekt Fəaliyyət Sammitində 61 ölkə birgə bəyannamə imzalayıb. 

Avtosfer.az xəbər verir ki, bəyannamədə süni intellektin təhlükəsizliyini və etibarlılığını təmin etmək üçün irəliləyişlərin əldə edilməsi vacibliyi vurğulanıb. Eyni zamanda, süni intellektin cəmiyyətlər üçün davamlı olması prioritet kimi göstərilib.

Fransa, Hindistan və Çin də daxil olmaqla bir çox ölkə süni intellektin "açıq, əhatəli və etik" olmasının önəmli olduğunu qeyd edərək bu istiqamətdə konsensus əldə ediblər.

Yelisey Sarayından verilən açıqlamada bildirilir ki, bu sammitdə süni intellekt və enerji məsələlərinin ilk dəfə çoxtərəfli şəkildə müzakirə edildiyi, biznes sektoruna olan təsirlərinin artan məlumatlılıqla diqqətə çatdırıldığı və bu sahənin gələcəyinə müsbət təsir edən texnologiyaların təşviq edilməsinin vacibliyi qeyd olunub.

Bəyannamədə süni intellektin idarə edilməsində koordinasiyanın gücləndirilməsi və bazarda inhisarlaşmanın qarşısının alınması məqsədilə tədbirlər görülməsinin zəruriliyi də vurğulanıb. Bu yanaşmalar texnologiyanın daha əlçatan olması və bütün cəmiyyətlərə fayda gətirməsi məqsədini daşıyır.

Eltac Zülfüqaroğlu