Dünyada ən nadir motosikletlərdən biri satılır - FOTO

"DubiCars" portalında "Lotus C-01" motosikleti satışa çıxarılıb.

Avtosfer.az xəbər verir ki, 2010-cu illərin ortalarında bu modeldən cəmi 100 ədəd istehsal edilib. Tanınmış yarış markasının bu kolleksiya nümunəsinin qiyməti 274 min dollara yaxındır.

Motosiklet xrom elementlər və nadir parlaq sarı rəngli əlavələrlə bəzədilib. Satışa çıxarılan nüsxə 2014-cü ildə istehsal edilib. Onun yürüşü 19 kilometrdir. Lakin istifadə izləri yoxdur, vəziyyəti yeni kimidir.

"Lotus C-01" Daniel Simonun layihəsi əsasında əl ilə yığılıb. Motosikletdə geniş şəkildə karbon lif və titandan istifadə edilib. Onun kütləsi 180 kiloqramdır. 1.2 litrlik mühərrik 200 at gücü hasil edir.

Xatırladaq ki, bir il əvvəl "Sotheby's" auksionunda fərqli rəngdə olan oxşar motosiklet satılıb. Sıfır yürüşə malik nəqliyyat vasitəsinin qiyməti 228 min dollar olub.(oxu.az)