Fantastik yaddaşa malik polis - 3000-ci şübhəlini yaxaladı

Fantastik yaddaşa malik britaniyalı polis məmuru 3000-ci şübhəlini saxlayıb. Bu barədə Avtosfer.az "Qaynarinfo"ya istinadən xəbər verir. Üzləri heyrətamiz dərəcədə yadda saxlayan 47 yaşlı baş inspektor Endi Pop tez-tez sıx məkanlarda və hətta aşağı keyfiyyətli təhlükəsizlik kamera görüntülərində cinayətkarları müəyyən edir. Onun bacarıqları dəfələrlə sınanıb və pandemiya dövründə maskalı olsalar belə şübhəliləri tanımağı bacarıb. Yaxınlarda isə o, rayonu üçün 3000-ci şübhəlini tutub. Ən maraqlı hadisələrdən biri onun bir il əvvəl gördüyü fotoşəkilə əsasən oğrunu tanıması olub. Digər bir hadisədə isə cinayətkarın üzündəki xal həlledici amiləçevirilib.

Polis məmuru bildirib:

"Sadəcə cinayətkarların tapılmasına və rayonumuzu daha təhlükəsiz etməyə kömək edə bilməyimə sevinirəm. Niyə üzlər yaddaşımda bu qədər yaxşı qalır, özüm də izah edə bilmirəm".

Endi hər gün növbəyə çıxmazdan əvvəl polis hesabatlarını öyrənir, kamera görüntülərini və fotoşəkilləri nəzərdən keçirir. Orta hesabla, o, iki iş növbəsi ərzində bir şübhəli müəyyən edir. Tez-tez ictimai nəqliyyatla rayonda gəzərək artıq yadda qalmış üzlərlə qarşılaşmaq fürsətindən istifadə edir. Lakin üzlərə qarşı unikal yaddaşına baxmayaraq, məmur etiraf edir ki, tarixləri yadda saxlamaqda tamamilə acizdir:

"Bütün bayram və yubileyləri yadımda saxlayan arvadımdır".