Kərə yağı istehlakı ölüm riskini artıra bilər - Araşdırma

“JAMA Internal Medicine” jurnalında dərc olunan yeni araşdırma kərə yağının bitki mənşəli yağlarla müqayisədə daha yüksək ölüm riski ilə əlaqəli olduğunu ortaya qoyub.

Avtosfer.az "AZƏRTAC"a istinadla xəbər verir ki, ABŞ-da 221 min orta yaşlı və yaşlı insanın 30 illik qidalanma vərdişləri təhlil edilərək aparılan tədqiqatın nəticələrinə görə, kərə yağını daha çox istehlak edən fərdlərin ölüm riski 15 faiz daha yüksəkdir. Əksinə, bitki mənşəli yağları daha çox istehlak edənlərdə bu risk 16 faiz daha aşağı olub.

Brigham və Qadın Xəstəxanasının tədqiqatçısı Yu Zhang bu nəticələrin sağlamlıq üçün əhəmiyyətli təsirə malik olduğunu vurğulayıb. Xüsusilə, zeytun yağı, soya yağı, kolza yağı və kanola yağı ürək-damar xəstəlikləri və xərçəngdən ölüm riskini azalda bilər. Lakin qarğıdalı və zəfəran yağlarında eyni təsir müşahidə edilməyib.

Mütəxəssislər qeyd edirlər ki, doymamış yağlarla zəngin bitki yağları (zeytun və kolza yağı kimi) sağlamlıq üçün faydalı olsa da, doymuş yağlarla zəngin olan kərə yağı, palma yağı və kokos yağı ürək-damar xəstəlikləri riskini artıra bilər. Bundan əlavə, bitki yağlarının tərkibindəki omeqa-3 yağ turşuları iltihabı azaltmağa kömək etdiyi halda, omeqa-6 yağ turşuları isə bəzi hallarda iltihab riskini artıra bilər. Araşdırmada bəzi məhdudiyyətlər mövcuddur. Belə ki, iştirakçıların əksəriyyəti tibb işçiləri olub və ümumi əhalini tam təmsil edə bilməzlər. Bundan əlavə, kərə yağı istehlak edənlər arasında piylənmə və siqaret çəkmə hallarının daha çox olması nəticələrə təsir edə bilər.

London Kral Kollecinin professoru Tom Sanders bu araşdırmanın bitki yağları ilə bağlı yayılan yanlış məlumatlara qarşı elmi sübutlar təqdim etdiyini bildirib. Ümumilikdə, nəticələr kərə yağı əvəzinə doymamış bitki yağlarının daha sağlam seçim olduğunu göstərir.