Mask ABŞ-də sürücüsüz taksilərin işə salınacağını elan etdi

Gələn ay ABŞ-nin Texas ştatının Ostin şəhərinin küçələrinə sürücüsüz taksilər çıxacaq.

Avtosfer.az xəbər verir ki, bu barədə CNBC-yə istinadən "Tesla" şirkətinin rəhbəri İlon Mask məlumat verib.

Onun sözlərinə görə, ilkin mərhələdə cəmi 10 taksi fəaliyyətə başlayacaq və proses uğurlu alınarsa, park minlərlə avtomobilə qədər genişləndiriləcək.

O əlavə edib ki, Ostindəki debütdən sonra robotaksilərin Kaliforniya ştatında - Los-Anceles və San-Fransisko şəhərlərində də istifadəyə verilməsi planlaşdırılır.

Mask qeyd edib ki, şirkət sürücüsüz avtomobillərin hərəkət edə biləcəyi ərazini məhdudlaşdıracaq və təhlükəsizliyi təmin etmək üçün maşınlarda sürücü olmayacaq. Bununla belə, "Tesla" əməkdaşları avtomobilləri uzaqdan idarə edəcəklər.

Onun sözlərinə görə, "Tesla"nın sürücüsüz texnologiyası, ilk növbədə, lidar və radar kimi sensorlara deyil, kameralar, kompüter görməsi və süni intellekt sisteminə əsaslanır.