Məşhur rəsm əsəri rekord qiymətə satıldı - FOTO

Məşhur avstriyalı rəssam Qustav Klimtin “Elizabet Ledererin portreti” adlı tablosu Nyu-Yorkda keçirilən hərracda rekord qiymətə - 236,4 milyon dollara satılıb. Avtosfer.az “Qafqazinfo”ya istinadən xəbər verir ki, bu tablo indiyədək hərraca çıxarılan əsərlər arasında ikinci ən bahalı əsər, həmçinin hərracda satılan ən bahalı müasir incəsənət əsəri olub. 1914-1916-cı illər aralığında çəkilmiş portretdə Klimtin yaradıcılığını dəstəkləyən varlı himayədarların qızı Elizabet Lederer Çin xalatında təsvir edilib.   20 dəqiqə davam edən hərracın qalibinin adı açıqlanmayıb. 

Qeyd edək ki, anşlüsdən, yəni Avstriyanın nasist Almaniyasına birləşməsindən sonra rəsm əsəri müsadirə edilib və məhv edilmək təhlükəsi ilə üzləşib. Əsər yalnız 1948-də Elizabetin qardaşı Erix Ledererə qaytarılıb, 1980-ci ildə isə kolleksioner Leonard Lauderin kolleksiyasına daxil edilib. 

Xatırladaq ki, Klimtin bundan əvvəlki hərrac rekordu ötən il 108 milyon dollara satılmış “Yelpikli xanım” portretinə məxsus idi.