Misir sivilizasiyası ilə eyni dövrə təsadüf edən 3500 illik qədim şəhər tapılıb - FOTO

Alimlər Perunun şimalındakı Barranka bölgəsində eramızdan əvvəl 1800–1500-cü illərə aid, 3500 illik qədim şəhər qalıqları aşkarlayıblar.

Avtosfer.az “Independent”ə istinadla xəbər verir ki, “Peñiko” adlı bu şəhərin qədim Misir və Mesopotamiya (Şumer) sivilizasiyaları ilə eyni dövrdə inkişaf etdiyi və Cənubi Amerikanın sahil zonası ilə And dağlarını birləşdirən ticarət mərkəzi rolunu oynadığı ehtimal olunur.

Arxeoloqların sözlərinə görə, bu şəhər başqa qədim mədəniyyətlərdən asılı olmayaraq müstəqil şəkildə formalaşıb və Karal mədəniyyətinin təsiri altında inkişaf edib. Karal sivilizasiyası isə Amerikada məlum olan ən qədim sivilizasiyadır və 5 min il bundan əvvəl yaranıb. Alimlər 600 metr yüksəklikdə yerləşən təpəlik ərazidə dairəvi forma verilmiş tikili, daş və palçıqdan inşa edilmiş qədim binaların qalıqlarını aşkarlayıblar.

Pilotsuz uçuş aparatları (dron) vasitəsilə aparılan tədqiqatlar insan tərəfindən inşa olunmuş strukturların, daha əvvəl aşkar edilmiş Karal-Supe sivilizasiyasına aid binalarla paralel şəkildə yerləşdiyini ortaya qoyub.