Plastikdəki kimyəvi maddələr ürək ritminə təsir göstərir - Araşdırma

Cincinnati Universiteti Tibb Kollecinin yeni araşdırması göstərib ki, plastik və şəxsi qulluq məhsullarında olan “BPA” adlı kimyəvi maddəyə yüksək məruz qalma ürəyin elektrik fəaliyyətində dəyişikliklər yarada bilər.

Avtosfer.az “MedicalXpress” portalına istinadla xəbər verir ki, tədqiqat 600 nəfər üzərində aparılıb. Sidik analizləri və EKQ nəticələri göstərib ki, bədəndə “BPA” səviyyəsi yüksək olan şəxslərdə ürək ritmində dəyişikliklər müşahidə olunur. “BPA” su butulkaları, yemək qabları, kassa çekləri, gözlük linzaları, uşaq şüşələri və makiyaj məhsullarında tapıla bilər. Mütəxəssislər bu maddələrin gündəlik həyatda geniş yayılmış fenollar qrupuna daxil olduğunu bildirirlər.

Araşdırmanın müəlliflərindən, kardioloq dr. Cek Rubinşteyn bildirib ki, sağlam insanlarda ciddi təsir gözlənilmir, lakin yaşlı və genetik olaraq risk qrupunda olan şəxslərdə bu maddələr ürəyin fəaliyyətinə mənfi təsir göstərə bilər. Bu, “BPA” kimi kimyəvi maddələrin insan ürəyinin elektrik sistemi ilə əlaqəsini göstərən ilk böyük tədqiqat sayılır. Alimlər növbəti mərhələdə kimlərin daha çox risk altında olduğunu və gündəlik “BPA” məruz qalmasını necə azaltmaq mümkünlüyünü araşdırmağı planlaşdırırlar.