Sürücü kruasanları isti-isti mağazaya çatdırmaq üçün 70-lik yolu 120 ilə getdi - VƏSİQƏSİZ QALDI - FOTO

Belçikanın Amua kommunasından olan sürücünün məhkəmədə dedikləri bir çox ölkədə jurnalistlərin marağına səbəb olub. 

Avtosfer.az xəbər verir ki,  polis sürücünü 70 km/saat sürət limiti olan yolda 121 km/saat sürətlə gedərkən saxlayıb. Təbii ki, belə böyük qayda pozuntusuna görə polisin cəza tətbiq etmək səlahiyhyəti olmadığı üçün iş məhkəməyə göndərilib. 

Məhkəmənin qərarı ilə sürücüyə 320 avrosu qiyabi olmaqla 640 avro cərimə kəsilib və sürücülük hüququndan məhrum edilib. O, vəsiqəsini bərpa etmək üçün təkrar imtahan verməlidir.

Bunlar Avropada istənilən sürücünün başına gələ bilər. Lakin ən maraqlı məqam sürücünün məhkəmədəki ifadəsi olub. O, bazar günü səhər saatlarında kruasanları mağazalara isti-isti çatdırmaq üçün sürəti artırdığını bildirib.

Təbii ki, məhkəmə bu “əsaslandırmanı” qəbul etməyib. Onun dəfələrlə oxşar qayda pozuntusuna yol verdiyi üzə çıxıb.

Bir maraqlı məqam da belçikalı sürücünün bizim bəzi sürücülərimizlə oxşarlığıdır. Əgər belçikalı fransız mədəniyyətinin təsiri ilə qayda pozuntusunu kruasan daşıması ilə izah edirsə, bizdə bəhanə budur: maşında xəstə var, xəstəxanaya çatmalıyam, və ya məşqə tələsirəm. Əksər hallarda isə bəhanələr əsassız olur.

Lakin belə “dəlillər” nə Azərbaycan, nə də Belçika polisini inandırmaq mümkündür. Bir sözlə, intizamsız sürücüləri dilindən, dinindən, vətəndaşlığından  asılı olmayaraq ümumi “dəyərlər” birləşdirir.

Vüqar Yaşaroğlu