Türkiyədə sürücü "Lamborghini"sini atıb qaçdı: Polis onu kolluqda tapdı - FOTO

Türkiyənin Bursa şəhərində polisin alkoqol yoxlanışını görən sürücü lüks idman avtomobilini geri çəkərək qaçmağa çalışıb.

Bu barədə Avtosfer.az İHA-ya istinadən xəbər verir.

Polis qrupları tez zamanda sarı "Lamborghini Gallardo"nu park edilmiş vəziyyətdə tapsa da, sürücü kolluqlara qaçıb və orada da yuxuya gedib. Polislər daha sonra onu kolluqlarda yatmış vəziyyətdə tapıb.

Alkotesteri üfürməkdən imtina edən sürücü yenidən qaçmağa başlayıb. Ona 550 000 lirə cərimə kəsilib, 10 milyon lirəlik avtomobili 60 gün müddətinə müsadirə edilərək dayanacağa aparılıb. Daha əvvəl də iki dəfə saxlanılan kişinin sürücülük vəsiqəsi 2042-ci ilə qədər əlindən alınıb. Motor ustası olan kişinin daha əvvəl də iki dəfə sürücülük vəsiqəsinin əlindən alındığı məlum olub.

Sürücü Kaya Ali A. ilə onu yuxuda ikən aşkarlayan polislər arasında keçən dialoq gülüş yaradıb.

"Burada nə edirsən?" - deyə polis soruşub.

"Yatırdım. Xoruldayırdım?" - deyə sürücü cavab verib.

"Orada yatmaqmı olar?" - deyə daha sonra jurnalistlərdən biri soruşub.

"Vallah, yuxuya getmişəm", - deyə sürücü bildirib.