Uzunmüddətli geomaqnit dalğalanmaları gözlənilir

Günəş-Yer xəttində böyük tac dəliyi müşahidə olunur, ona görə də yaxın günlərdə Yer kürəsində maqnit qasırğalarının olması mümkündür. Avtosfer.az-ın Oxu.az-a istinadən xəbərinə görə, bu barədə Rusiya Elmlər Akademiyasının Kosmik Tədqiqatlar İnstitutunun Günəş Astronomiyası Laboratoriyası və Rusiya Elmlər Akademiyasının Sibir bölməsinin Günəş-Yer Fizikası İnstitutu məlumat verib.

"Günəşin Yerə baxan tərəfində son bir neçə gündə müşahidə edilən və tədricən şərqdən qərbə (soldan sağa) doğru hərəkət edən kifayət qədər böyük tac dəliyi bu gün (23 iyun - red.) Günəş-Yer xəttinə çıxıb. Görünən diskin mərkəzindəki dəliyin indiki yerləşməsi artıq onun Yerə təsir göstərməsinə imkan verir, lakin faktiki olaraq, sürətli günəş küləyinin axınları Yerə ancaq 2-3 gündən sonra çatacaq", - deyə məlumatda bildirilib.

Laboratoriya alimlərinin qeyd etdiyi kimi, tac dəliyinin Yerə təsirindən tamamilə qaçmaq mümkün olmayacaq. Proqnoza görə, iyunun 25-dən başlayaraq uzunmüddətli geomaqnit dalğalanmaları gözlənilir.