Yarım milyon al, işdən çıx

Gəlirləri azalan və rəqabətdə çətinlik çəkən Mercedes şirkəti xərclərini azaltmaq qərarına gəlib. Bunun ən səmərəli yollarından biri də işçilərin ixtisar edilməsidir. Lakin, qanun minlərlə işçini obrazlı desək, çölə tökməyə icazə vermir. 

Avtosfer.az xəbər verir ki, həmkarlarla imzalanmış kollektiv müqviləyə görə 2035-ci ilədək ixtisarlar istisna edilir. Buna görə də, şirkət çıxış yolu axtarır. Konsernin rəhbərliyi işdən könüllü çıxanlara maddi yardım təklif edir. Məsələn, aylıq məvacibi 9000 avro olan, 20 ildən çox iş stajı olan texnik 500 000 avro kompensasiya ala bilər. Eyni staja malik, 7500 avro maaşlı keyfiyyət nəzarətçisi isə 300 000  avro əldə edə bilər. 
Ekspertlərin fikrincə, bu təklif gənclər üçün çox da cəlbedici deyil, lakin pensiya yaşı yaxınlaşanlar kütləvi şəkildə işdən çıxa bilərlər. Beləliklə, işçi qüvvəsinin əsasını daha az maaş alan gənc mütəxəssislər təşkil edə bilər.

Vüqar