Taksi sürücülərinə vahid iş qrafiki tətbiq oluna bilər

“Taksi sürücüləri üçün vahid iş qrafikinin tətbiqi mümkün deyil”.

Bu fikirləri nəqliyyat məsələləri üzrə ekspert Yasin Mustafayev bildirib.

Ekspertin sözlərinə görə, bu sahədə həm gündüz, həm də gecə saatlarında çalışan sürücülər var:

“Taksilərin vahid iş qrafiki ola bilməz. Lakin onların işləmə müddətinə limit qoyulması mümkündür. Bu limit 6, 8 və ya 10 saat ola bilər. Əslində hazırda belə bir məhdudiyyət mövcuddur. Ona görə də vahid qrafik tətbiq etmək real deyil”.

Yasin Mustafayev qeyd edib ki, bəzi hallarda bir avtomobildən bir neçə sürücü istifadə edir. Onlar növbəli iş rejimində çalışaraq avtomobili öz aralarında bölüşə bilərlər:

“Bir avtomobil üçün bir neçə buraxılış kartı da ola bilər. Sürücülər növbəli şəkildə işləyirlər. Amma əsas şərt odur ki, bir sürücü 8 saatdan artıq sükan arxasında ola bilməz”.

Ekspert vurğulayıb ki, məqsəd sürücülərin yorğunluğunun qarşısını almaq və yol hərəkətinin təhlükəsizliyini təmin etməkdir./konkret.az