Bakı-Qazax yolunda sürücülər əlbəyaxa oldu – "Sol zolaq mənimdir, adamını tanı" - VİDEO

Bu hadisənin ötən gün şahidi olmuşam. “Mercedes Vito” markalı mikroavtobusla Bakıya qayıdarkən başqa bir avtomobil sürücüsünün təhlükəli manevr edərək, işıq və səs siqnalları ilə yol istədiyinin şahidi oldum. Bu hal bir neçə dəfə təkrarlandı. Bu an qəflətən “Vito”nun sürücüsü həmin  avtomobilə əllə işarə edərək saxlamasını tələb etdi. Həm də sürücü elə kəskin manevr etdi ki, salondakılar qorxuya düşdü. O, maşından endikdə digər sərnişinlər də hər ehtimala qarşı yerə düşdülər.
99 ZL 534 markalı “Chevrolet”in sürücüsü iddia etdi ki, haqlıdır, maşında ölümcül xəstə var və buna yol verilməlidir. 90 TT 983 markalı “Vito”nun sürücüsü də özünü haqlı çıxarmağa çalışdı. Təxminən 1 dəqiqə çəkən mübahisədən sonra hər kəs sakitcə yoluna davam etdi. 
Bəs əslində kimdir günahkar? Bu suala cavab üçün əvvəlcə hadisənin baş verdiyi əraziyə diqqət edək. Bu mübahisə Bakıya 70 km məsafədə, Azpetrol YDM-dən təxminən 500 metr uzaqda, saat 17.53-də baş verib. Həmin hissədə yük avtomobilləri sağ zolağı dağıtdığından əksər sürücülər sol yolla getməyə məcbur olurlar. Bu da çox vaxt qəza şəraiti və gərgin anların yaranması ilkə nəticələnir. “Vito” sürücüsü iddia edir ki, heç kim maşını dağıtmamaq üçün sol yolla getmir (bunun dəfələrlə şahidi olmuşam).  Xüsusən də gecə saatlarında. Bir sözlə, bu situasiyada tələsən “Chevrolet” sürücüsünə və ya səbrsiz “Vito” sürücüsünə haqq verməsəm də bir məsələ aydındır: yol normal olsa, belə konfliktlərə də şərait yaranmaz.

Vüqar