Biləcəridə park edilmiş maşın sürücüləri qayda pozmağa məcbur etdi - VİDEO

Paytaxtın Binəqədi rayonu, Biləcəri qəsəbəsində qayda pozan sürücü kameraya düşüb.

Avtosfer.az-ın məlumatına görə, hadisə oktyabrın 14-də saat 11:22 radələrində Xurşidbanu Natavan küçəsində qeydə alınıb.

Kadrlardan göründüyü kimi, 77-DF-731 dövlət nömrə nişanlı “Toyota” markalı avtomobilin sürücüsü bütöv xəttin (1.1 nişanlanma xətti) tələbini pozaraq avtomobilini yolun hərəkət hissəsində saxlayıb. Nəticədə arxadan gələn nəqliyyat vasitələrinin hərəkəti məhdudlaşıb. Videoda avtobus sürücüsünün maneəni keçmək üçün bütöv xətti tapdalayaraq digər zolağa keçdiyi aydın görünür.

Şikayətçinin sözlərinə görə, qayda pozan sürücü həmin vaxt sükan arxasında olmasa da, yaxınlıqda olub. Vəziyyəti görməsinə baxmayaraq, avtomobilini hərəkətə mane olmayacaq təhlükəsiz yerə çəkməyib.

Qeyd edək ki, 1.1, 1.3 və 1.11 nişanlanma xətlərinin olduğu yollarda nəqliyyat vasitəsinin həmin xətdən 3 metrdən az məsafədə saxlanılması qayda pozuntusu hesab olunur. Sürücü avtomobilini xətdən ən azı 3 metr məsafədə saxlamalıdır.

Nərmin