Özü qəsdən qayda pozub günahsız sürücüyə şər atdı - VİDEO

Bakıda qayda pozan sürücü qeydə aldığı videonu sosial şəbəkədə paylaşaraq özünü ifşa edib. Avtosfer.az xəbər verir ki, hadisə aprelin 28-də, paytaxtın hava limanı yolunda baş verib.
Belə ki, 90-PC-061 qeydiyyat nişanlı "Hyundai" markalı avtomobilin sürücüsü sağ zolaqla hərəkət edən "Ford" markalı avtomobilin qəfil zolağına manevr edərək onu sıxışdırıb. Bu azmış kimi bir az irəlidə onu yenidən sağa sıxışdıraraq qarşısını kəsib. Sürətli yolda ikinci cərgədə dayanan sürücü təhlükə yaratmaqla yanaşı mübahisə etməyə başlayıb. O, "Ford"un sürücüsünə yol verməli olduğunu iddia edib. "Ford"un sürücüsü isə heç bir qayda pozuntusuna yol vermədiyini bildirib.
Bəs bu situasiyada kim haqlıdır?
Qeyd edək ki, ikinci dərəcəli yoldan gələn avtomobilin qarşısında "yol ver" nişanının olmasına baxmayaraq, trayektoriyanın kəsişmədiyi halda yol verməli deyil.
Yol vermə vəziyyəti o zaman yaranır ki, ikinci dərəcəli yolla hərəkət edən avtomobilin baş yoldakı avtomobillə trayektoriyası kəsişsin. Bu kəsişmədə isə hər iki avtomobil üçün ayrıca zolaq var. Burada trayektoriya kəsişmədiyindən yol vermə vəziyyəti də yaranmır. Əksinə, görüntünü qeydə alan avtomobil zolağını dəyişdiyi üçün özü sağ zolaqdakı nəqliyyat vasitəsinə yol verməlidir.

Fərid