Avropa aeroportları terroristləri poliqraf vasitəsilə saxlamaq niyyətindədir

Avropanın hava limanları terroristləri təyyarəyə minənə kimi aşkar etmək məqsədilə sərnişinləri poliqraf (yalan detektoru) vasitəsilə yoxlayacaq. Avtosfer.az Azərtac-a istinadən bildirir ki, yeni texnologiya üzün mimikasını və yalan ifadələri aşkar edəcək, sərnişinin öz baqajı və səfərin məqsədi ilə bağlı suallara düzgün cavab verə bilib bilməyəcəyini müəyyənləşdirəcək. Yunanıstan, Macarıstan və Latviya yeni texnologiyanın altı ay ərzində tətbiq ediləcəyi ilk ölkələr olacaq. Avropa İttifaqı ölkələrinə üz tutan və bu ölkələrin vətəndaşı olmayan hər bir turist onlayn müraciəti dolduraraq viza, pasport və bank hesabını xüsusi sistemə yükləməlidir. Bundan sonra İBorderCtrl adlı robot-sərhədçi tərəfindən müsahibə alınacaq. Robot turistə sual verərək mimikasını və dediklərini analiz edəcək, onun yalan danışıb danışmadığını müəyyənləşdirəcək. Layihənin əlaqələndiricisi - Lüksemburqda yerləşən "European Dynamics" şirkətlər qrupunun təmsilçisi Corc Boultadakis qeyd edib ki, bundan sonra sərhəd yoxlamalarının yüksək səviyyədə aparılması üçün ən son texnologiyalardan və yeniliklərindən istifadə olunacaq.