Telefon batareyaları niyə şişir? - Mütəxəssisdən xəbərdarlıq

Sosial şəbəkələrdə videolara baxarkən tez-tez rastlaşırıq ki, batareyası şişmiş telefon partlayır.

Bəs buna səbəb nədir və niyə batareya şişərək partlayışa səbəb ola bilər?

Avtosfer.az-ın məlumatına görə, mövzu ilə bağlı Redaktor.az-a açıqlamasında mütəxəssis Aqşin Abdulla bildirdi ki, batareyanın şişməsi onun ömrünün başa çatdığı deməsidir:

"Batareya partlayır, çünki zədə alır. Şişmə zamanı elə hallar olur ki, batareya şişdiyi üçün korpusun içində sıxılır, hansısa bir detala ilişir və nəticədə partlayış baş verir. Amma ümumilikdə belə partlayışlar nadir hallarda müşahidə olunur. Android telefonlarda, xüsusilə köhnə, sadə modellərdə batareyalar nisbətən zəif olur. Zədələnmədən qəti şəkildə çəkinmək lazımdır, çünki litium batareyalar xüsusi plenkaya bükülüb və hər iki tərəfi bir-birindən izolyasiya olunub. Əgər batareya zədələnərsə, bu izolyasiya pozulur, iki səth birləşir və nəticədə enerji anidən boşalır. Bu, batareyanın hədsiz dərəcədə qızmasına, istilik yaratmasına və nəticədə yanmasına səbəb olur. Belə hallarda həm telefon, həm də ətraf mühit üçün təhlükə yaranır, ona görə də istifadəçilər batareyanın şişdiyi və ya deformasiyaya uğradığı hallarda cihazı dərhal söndürməli və mütəxəssisə müraciət etməlidirlər".