Bu taksi şirkətləri CƏRİMƏLƏNƏCƏK - XƏBƏRDARLIQ

“Əgər müştərilər taksi sifariş verdikləri zaman onlara mesaj vasitəsilə haqqında məlumat verilən avtomobilin yerinə başqası gəlirsə, bu, artıq taksi operatorunun problemidir. Bu hal taksi şirkətlərinin mövcud qanunvericiliyi kobud qaydada pozması deməkdir”.

Avtosfer.az xəbər verir ki, bunu “TNS”ə açıqlamasında nəqliyyat məsələləri üzrə ekspert Eldəniz Cəfərov bildirib. O qeyd edib ki, bu halla qarşılaşan vətəndaşlar istehlakçı hüquqlarının pozulması ilə bağlı İqtisadiyyat Nazirliyinə şikayət edə bilər.

Taksi xidməti sahəsində son dövrlər aparılan tənzimləmələrin effekt verib-verməməsi məsələsinə gəlincə, ekspert bildirib ki, aparılan işlər qismən effekt verir:

“90-100 faiz nəticə əldə etmək, taksini birdəfəlik olaraq keyfiyyətli və təhlükəsiz etmək üçün əsas məsuliyyət taksi şirkətlərinin üzərinə düşür. Əgər taksi şirkətləri bu qaydalara əməl etməyəcək, qanunları, sürücülərin hüquqlarını pozmaqda, sərnişinləri aldatmaqda davam edəcəklərsə, problemin həlli çətin olacaq. O zaman müvafiq qurumlar da məcbur olacaq ki, həmin taksi şirkətlərinə qarşı daha böyük sanksiyalar, böyük cərimələr işə salsın”.