Bu da Naxçıvanın yeni avtobusları - FOTO

Bu il Naxçıvan Muxtar Respublikasına yeni iritutumlu avtobuslar gətiriləcək. Avtosfer.az AzərTAc-a istinadən xəbər verir ki, sərnişin sıxlığı qədim diyara yeni avtobusların gətirilməsi zərurəti yaradıb. Digər tərəfdən, muxtar respublikanın avtomobil yollarının beynəlxalq standartlara uyğun olaraq yenidən qurulması müasir ictimai nəqliyyat növlərinə ehtiyacı daha da artırıb. Odur ki, şəhərdaxili sərnişindaşımada istifadə olunan nəqliyyat vasitələri sürətlə yeniləşdirilir. Hazırda Naxçıvan şəhərində sərnişindaşıma müasir iritutumlu avtobuslarla həyata keçirilir. Son illər Naxçıvan Şəhər Nəqliyyat İdarəsinin maddi-texniki bazası xeyli möhkəmləndirilib, 2 “Mersedes-Benz Traveqo” , 37 “King Long” və 8 “Liaz” markalı iritutumlu avtobuslar alınaraq xəttə buraxılıb.

Naxçıvan Muxtar Respublikası Ali Məclisi Sədrinin 2014-cü il 31 yanvar tarixli Sərəncamı ilə təsdiq olunmuş “2014-2015-ci illərdə Naxçıvan şəhərinin sosial-iqtisadi inkişafı üzrə Proqram”a əsasən, hazırda şəhərdaxili nəqliyyatda beynəlxalq standartlara cavab verən müasir avtobusların alınması, şəhərdə nəqliyyatın hərəkətinin sıx olduğu yerlərdə piyada keçidlərinin yaradılması və yeni dayanacaqların quraşdırılması işləri davam etdirilməkdədir.