BDYPİ bölgələrə səfər edən sürücülərə və sərnişinlərə müraciət etdi - VİDEO

Novruz bayramı ilə əlaqədar qeyri-iş günlərində paytaxtdan bölgələrə, eləcə də əks istiqamətdə nəqliyyat axınının əhəmiyyətli dərəcədə artacağı gözlənilir.

Avtosfer.az xəbər verir ki, yol-nəqliyyat hadisələrinin qarşısının alınması, insanların rahat və təhlükəsiz hərəkətinin təmin olunması üçün Baş Dövlət Yol Polisi İdarəsi gücləndirilmiş iş rejimində xidmət aparmaqla yanaşı, səfərə çıxmağa hazırlaşan sürücülərə müraciət edərək yol hərəkəti qaydalarına ciddi riayət etmələrini, yolda müəyyən edilmiş sürət həddini aşmamalarını tövsiyə edib.

Sürücülər, sürət rejimini yol və hava şəraitinə uyğun seçməli, ötmə və manevretmə qaydalarını pozmamalı, tələskənliyə yol verilməməli, yorğun, yuxusuz halda sükan arxasına əyləşməkdən çəkinməlidirlər.

Dəyərli sürücülər! Yolboyu nümunəvi sürücü davranışı sərgiləməklə digər hərəkət iştirakçılarına örnək, intizamsız sürücülərə münasibətdə səbirli və təmkinli olun, yol hərəkəti qaydalarına riayət etməklə əzizlərinizə bayram sevinci bəxş edin”.