Neftçalada maarifləndirici tədbir keçirilib - FOTO

Neftçala Rayon Polis Şöbəsinin təşkilatçılığı ilə rayonun Bankə qəsəbə 1 saylı tam orta məktəbində “Ağ ölüm bəşəriyyətin bəlasıdır” və “Erkən nikaha qətiyyətlə yox deyək” mövzularında maarifləndirici tədbir keçirilib. 
Tədbirdə Təhsil şöbəsinin nümayəndələri, RPŞ-nin əməkdaşları, məktəbin pedaqoji heyəti və yuxarı sinif şagirdləri iştirak ediblər.
Görüşdə çıxış edən RPŞ-nin rəisinin Şəxsi Heyətlə İş üzrə Köməkçisi, polis kapitanı Valeh Hətəmov narkotiklərin insan sağlamlığına vurduğu zərərlərdən danışaraq bu vasitələr barədə geniş məlumat verib. Erkən yaşlarda gənclərin ailə həyatı qurmasından da danışan polis kapitanı, yeniyetmə vaxtlarında gənclərin, xüsusən də qızların ailə qurmasının onların gələcəkdə fiziki və mənəvi sağlamlığı üçün ciddi təhlükə törətdiyini qeyd edib.
Tədbirin sonunda narkotiklərin zərərli təsiri ilə bağlı videoçarxlar nümayiş etdirilib və məktəbliləri maraqlandıran suallar cavablandırılıb.