Paytaxtı bir-birinə qatan nömrəsiz motosiklet sürücüsü həbs olundu - FOTO

Mayın 31-də saat 19:03 radələrində "Pajang" markalı, dövlət nömrə nişanı çıxarılmış motosiklet sürücüsü müxtəlif üsullarla paytaxtın Nəsimi və Nərimanov rayonları ərazisində avtoxuliqanlıq hərəkətləri edib. Avtosfer.az xəbər verir ki, yüksək sürətlə hərəkət edən motosiklet sürücüsü dəfələrlə yol hərəkəti qaydalarını kobud şəkildə pozaraq əhalinin dincliyini pozub. 

DYP əməkdaşları Süleyman Rəhimov və Rəşid Behbudov küçələrinin kəsişməsində süni tıxac yaradaraq sürücünü saxlayıb. Araşdırmalar zamanı məlum olub ki, sürücü Abbasov Nurəddin Şahin oğludur. Sürücü aidiyyəti üzrə Nəsimi RPİ-nin 22-ci polis bölməsinə təhvil verilib.

Onun barəsində toplanmış materiallar məhkəməyə təqdim olunub.

Məhkəmənin qərarına əsasən o, 1 il sürücülük hüquqdan məhrum olunmaqla 20 gün müddətində inzibati qaydada həbs edilib. 

Fərid