“Yol hərəkəti qaydalarını uşaqlara necə öyrətməli? - FOTO

 “Məktəblinin dostu” layihəsi, Bakı Şəhər Dövlət Yol Polisi İdarəsi və Azərbaycan Milli Avtomobil Klubunun birgə əməkdaşlığı çərçivəsində məktəblinin dostları üçün “Yol hərəkəti qaydalarını uşaqlara necə öyrətməli?” mövzusunda təlimlərə start verilib.

Avtosfer.az xəbər verir ki, tədbirdə Bakı Şəhər Dövlət Yol Polisi İdarəsinin Hərəkətin təşkilinin təbliği və ictimai qurumlarla əlaqə bölməsinin əməkdaşları Pərvanə Muradova və Elnur Mahmudov,

Azərbaycan Milli Avtomobil Klubunun əməkdaşı Həsən Xıdırov, “Məktəblinin dostu layihəsinin əməkdaşları iştirak ediblər.

Təlimin keçirilməsində məqsəd məktəblərdə fəaliyyət göstərən məktəblinin dostlarını yol hərəkəti qaydaları və təhlükəsizliklə bağlı məlumatlandırmaq, onların bu mövzuda şagirdlərlə təşkil etdiyi təlimlərə daha peşəkar yanaşmasını təmin etməkdir.

Təlimçilər “Yol hərəkətinin təhlükəsizliyi”, “Yol hərəkəti qaydalarına riayət edək” mövzusunda çıxış ediblər.

Təlimdə yol hərəkəti qaydaları ilə bağlı məktəblilərin erkən yaşlardan məlumatlandırılması, onlara nəqliyyat yollarında  təhlükəsiz hərəkət etmək üçün bilməli olduqları yol nişanlarının tanıdılmasının vacibliyi vurğulanıb.  

Bununla yanaşı, uşaqlarla bağlı yol-nəqliyyat hadisələrinin qarşısının alınması üzrə profilaktiki tədbirlərin həyata keçirilməsi, məktəblilərin bu istiqamətdə maarifləndirilməsi üçün təhsil müəssisələri və qurumların birgə fəaliyyətinin əhəmiyyətindən danışılıb.

Qeyd edək ki, “Yol hərəkəti qaydalarını uşaqlara necə öyrətməli?” mövzusunda keçirilən təlimlər fevralın 25-dək davam edəcək.