Yol polisi 3-cü mikrorayon dairəsində tıxac yaradan taksilərə qarşı reyd keçirdi - FOTO - VİDEO

Bu gün Baş Dövlət Yol Polisi İdarəsi və Bakı şəhər Dövlət Yol Polisi İdarəsinin əməkdaşları paytaxtın 3-cü mikrorayon dairəsi kimi tanınan ərazisində reyd keçirib. Avtosfer.az xəbər verir ki, tədbir rayonlararası taksi fəaliyyəti ilə məşğul olan sürücülərə qarşı olub. Belə ki, Daxili İşlər Nazirliyinə ətrafda yaşayan sakinlərdən çoxsaylı şikayətlər daxil olub. Vətəndaşlar ərazidəki səs-küydən, eyni zamanda yaranan tıxacdan şikayət edib. Yol polisi əməkdaşları sürücülərlə profilaktiki söhbətlər aparıb, onlara qanunvericiliyin tələbləri izah edilib. Bildirilib ki, bu cür fəaliyyət yolverilməzdir. 
Bakı şəhər Dövlət Yol Polisi İdarəsinin baş inspektoru, polis mayoru Araz Əsgərli sürücülərlə söhbət zamanı Bakı Beynəlxalq Avtovağzal Kompleksi ərazisində pulsuz olaraq şərait yaradıldığını bildirib və qeyd edib ki, fəaliyyət göstərmək üçün həmin əraziyə getsinlər. 
Eyni zamanda bu insanların təhlükəsizliyi üçün də önəmlidir. 
Sürücülər isə müxtəlif bəhanələrlə burda fəaliyyətin onlara rahat olduğunu qeyd ediblər. Lakin polis bunun digər vətəndaşların hüquqlarını pozduğunu bildirib. 
Bu cür reydlərin mütəmadi olaraq davam edəcəyi nəzərə çatdırılıb.