Yol polisindən "təpikləndiyini" deyən sürücü ilə bağlı AÇIQLAMA

"Kanal13.TV" səhifəsində "Polis vətəndaşı təpiklədi - "Nə edim ki, Qarabağ əlilisən?" başlıqlı video yayımlanıb. Videoda Qarabağ əlili olduğunu deyən Xanlar Quliyev adlı şəxs  iddia edir ki, Gəncədən ziyarətgahdan qayıdan zaman yol polisləri ona fiziki təzyiq göstərib. İddialara görə, Gəncə şəhərində yol polisi əməkdaşları onu və dostunu saxlayıb və sənədlərini tələb ediblər. Lakin Xanlar Quliyev onlara əlillik vəsiqəsini təqdim edib. Daha sonra isə yol polisləri ilə mübahisə yaranıb. 
Gəncə şəhər Dövlət Yol Polisi şöbəsindən Avtosfer.az-a bildirilib ki, sürücü Xanlar Quliyev "Mercedes Sprinter" markalı yük-sərnişin maşınını heç bir sənədi olmadan idarə etdiyi üçün saxlanılıb. Yoxlama zamanı onun sürücülük vəsiqəsinin etibarlılıq müddətinin 2015-ci ildə bitdiyi üzə çıxıb. Yəni həmin vaxt sürücülük hüququ, etibarnaməsi olmadan nəqliyyat vasitəsi idarə etdiyi üçün avtomobilin duracağa yerləşdiriləcəyi bildirildikdə o, nalayiq söyüşlərlə polis əməkdaşlarını təhqir etməyə başlayıb və yerdən götürdüyü iri daşla onlara, eləcə də patrul avtomobilinə xəsarət yetirməyə cəhd edərkən onun bu cəhdinin qarşısını alan polis əməkdaşı ilə birlikdə yıxılıblar. 
Faktla bağlı hazırda Gəncə şəhər prokurorluğunda araşdırma aparılır.

Emin