Aİ-də yeni avtomobillərin satışı dekabrda kəskin azalıb

2021-ci il ərzində Avropa İttifaqı (Aİ) ölkələrində yeni minik avtomobillərinin satışı əvvəlki illə müqayisədə 2,4% azalaraq 9,7 milyona, dekabrda isə illik ifadədə 22,8% azalaraq 795 295-ə düşüb.

Avtosfer.az xəbər verir ki, bu barədə Avropa Avtomobil İstehsalçıları Assosiasiyasının (ACEA) açıqlamasında deyilir.

Qeyd olunur ki, Almaniyada dekabrda satış göstəricisi 26,9%, Fransada 15,1%, İtaliyada 27,5%, İspaniyada 18,7% azalıb.

Eyni zamanda, əsas bazarlar yanvar-dekabr aylarında artım nümayiş etdirib. İtaliyada 5,5%, İspaniyada – 1%, Fransa – 0,5% artım qeydə alınıb, Almaniyada isə satışlar 10,1% azalıb.

Assosiasiyanın məlumatına görə, ilin əvvəlindən Avropada yeni "Stellantis" avtomobillərinin (keçmiş "Fiat" və PSA) satışı illik ifadədə 2,1%, "Volkswagen Group"un – 4,8%, "Renault Group"un – 10,2% azalıb. Dekabrda "Stellantis"in satışları illik müqayisədə 25%, "Volkswagen Group"un – 31,6%, "Renault Group"un isə 12,6% azalıb.

APA