"Mercedes-Benz" elektrikli avtomobillərini Hindistanda yığacaq

Almaniyanın avtomobil istehsalçısı Mercedes-Benz bu il Hindistanda elektrikli avtomobillərini (elektromobil) yığmağa və yerli bazarda satmağa başlayacaq.

Marja xəbər verir ki, bu barədə cümə axşamı “Business Standard” qəzeti məlumat yayıb.

Şirkətin Hindistan filialının rəhbəri Martin Şvenk bildirib ki, “Mercedes-Benz 2022-ci ilin dördüncü rübündə istehsalını və Asiyada satışını diversifikasiya etmək planının bir hissəsi olaraq Hindistanda istehsal edilən elektrikli avtomobillərinin satışına başlayacaq”.

Mercedes-Benz 2020-ci ildə Hindistanda öz elektrikli yolsuzluq avtomobilinin idxal edilmiş modellərini satmağa başlayıb. "İndi biz xaricdən gətirilən avtomobili Hindistan istehsalı olan avtomobilə çeviririk"- Şvenk deyib.

Son iki il ərzində Mercedes-Benz Hindistanda avtomobil yığma müəssisələrinin inkişafına sərmayəsini 351 milyon dollara çatdırıb. Qlobal miqyasda şirkət 2030-cu ilə qədər elektrik avtomobillərin inkişafına 40 milyard avrodan (47 milyard dollar) çox sərmayə qoymağı planlaşdırır, onların istehsalında Amerikanın Tesla şirkəti ilə rəqabət aparmağa hazırlaşır.

Hazırda Hindistanda elektriklə işləyən avtomobillərin idxal rüsumları 100% təşkil edir ki, bu da xaricdəki istehsal şirkətləri üçün maneədir. Keçən il Tesla Hindistan hökumətinə elektrikli avtomobillərin idxal rüsumlarını 40%-ə qədər azaltmağı təklif etmişdi.