Marşrut sürücülərinin iş prosesinə nəzarət gücləndirilir - VİDEO

Bir neçə gün bundan qabaq «Avtomobil nəqliyyatı haqqında» qanuna edilən bir sıra dəyişikliklər qüvvəyə minib. Burada ən diqqət çəkən yeniliklərdən biri sərnişin avtobuslarına və yük maşınlarına quraşdırılacaq taxoqraf qurğularıdır. Bu qurğu sürücülərin iş qrafikinə necə əməl edilməsini də nəzarətdə saxlayacaq.

Halbuki Nazirlər Kabinetinin müvafiq qərarına uyğun olaraq onların iş müddəti fasilələrlə 9 saatdan artıq olmamlıdır. ''Avtomobil nəqliyyatı haqqında'' yeni qanunda avtobusların sürücülərinin iş və istirahət rejimi xüsusi diqqətdə saxlanılır. Sürücülərin nəzərdə tutulduğundan artıq işləməməsi üçün avtobuslarda məcburi şəkildə taxoqrafların quraşdırılması nəzərdə tutulub.

Elektron cihaz olan taxoqrafın iş prinsipi belədir ki, sürücü xüsusi kartı aparata daxil edəcək. Bundan sonra işə düşən taxoqraf sürücünün neçə saat işləməsi haqqında məlumatları özündə saxlayır. Yəni nəqliyyat vasitəsi hərəkətdə olanda həmin müddət iş saatı kimi cihazın yaddaşına yazılır. Bu isə sahibkarların yaratdığı mərkəzi bazada öz əksini tapacaq.

İş qrafikindən artıq işləmək sürücülərin hüquqlarının pozulması, sahibkarların isə daha çox gəlir qazanması deməkdir. Çünki 9 saatlıq normaya əməl ediləndə gərək eyni nəqliyyat vasitəsində gərək ən azı 2 sürücü işləsin.

Ekspert hesab edir ki, çıxış yolu taxoqrafın məlumat bazasına müvafiq dövlət qurumunun nəzarətinin təmin edilməsidir.