Prezident tıxaclarla mübarizəyə ordunu cəlb etmək istəyir - FOTO

Konqo Demokratik Respublikasının Prezidenti Feliks Çizekedi tıxaclarla mübarizə üçün orijinal təklif irəli sürüb. 

Avtosfer.az xəbər verir ki, dövlət başçısı paytaxt Kinşasada hərəkəti nizamlamaq üçün yol patrulu işinə hərbçiləri də cəlb etmək istəyir. 17 milyon nəfər əhalisi olan paytaxt Kinşadada sutka ərzində hökm sürən nəqliyyat xaosu (bunu tıxac və ya sıxlıq adlandırmaq doğru olmaz – müəl.) ölkənin iqtisadi inkişafına ciddi zərbə vurur. Çizekedi bu vəziyyəti dözülməz adlandırıb. 
Yerli əhali və ekspertlər problemin bu yolla həllini real saymır. Başlıca səbəb ictimai nəqliyyatın demək olar yoxluğudur. Daşımaların mütləq əksəriyyəti mikroavtobuslar (fula fula) və mototaksilərlə (veva) həyata keçirilir. Sürücü intizamından danışmağa isə ümumiyyətlə dəyməz.
Bu ölkəyə turist kimi səfər etdiyim üçün deyə bilərəm ki, Kinşasadakı xaosu azərbaycanlı oxucuya sözlə izah etmək mümkün deyil. Gündüz bir qədər qayda-qanun olsa da, axşam saatlarında maşınlar obrazlı desək, bir-birinə girir. Azərbaycanda istənilən sürücü sayrışan işıq yandıran polis avtomobilinə yol verir. Kinşasada isə  operativ nəqliyyat vasitələrini də sayan yoxdur. Hava qaraldıqdan sonra demək olar heç kim öz zolağı ilə hərəkət etmir.

Vüqar Yaşaroğlu