Rusların yeni elektromobili Tesladan baha oldu

Rusiyanın media qurumları bir neçə gün əvvəl yeni Lada e-Largus modelini təmtəraqla təqdim etdi. Dünyada analoqu olmayan, tam yerli istehsal və s. tipli ənənəvi epitetlər də təqdimatda yer aldı. Lakin nədənsə qiymət məsələsi xatırladılmadı. Səbəbsiz deyilmiş.

Avtosfer.az xəbər verir ki, yeni elektromobilin qiyməti artıq məlum olub. 2004-cü ilin Renault Logan avtomobili bazasında yaradılmış elektromobilin yük versiyasının (furqon) qiyməti təxminən 4 milyon rubldur, başqa sözlə 42 500 dollar.
Maşını dövlət subsidiyası ilə 3 milyon rubla, yəni 32400 dollara almaq mümkündür. Müqayisə üçün deyək ki, bazarda Tesla 3 heç bir subsidiya və endirim olmadan 35 000 dollara təklif edilir.
Nəzərə alaq ki, elektromobilin sərnişin versiyası bir neçə min dollar daha baha olacaq. Bu da bir daha göstərir ki, hansısa modelin bazarda yer tutması üçün keyfiyyətlə yanaşı qiymət münasibliyi də vacibdir. Bunun əvəzinə hökumətdən hansısa məhdudlaşdırıcı tədbir tələb etmək tipik sovet yanaşmasıdır. 
Sizcə, Çin detalları ilə, köhnə fransız avtomobilin bazasında yaradılmış elektromobil Teslanın, yaxud elə Çin elektromobillərinin qarşısında duruş gətirə biləcəkmi?

Vüqar Yaşaroğlu