Bakı-İrəvan təyyarə reysləri açılır: Biletlər bu qiymətədir

Azərbaycanın paytaxtı Bakıdan Ermənistanın İrəvan şəhərinə təyyarə reysləri açılır. Avtosfer.az "Yenisabah"a istinadən xəbər verir ki, artıq uçuşların biletləri satışa çıxarılıb.

Məlumata görə, “Aviasales” aviabilet axtarış sistemi Bakı-İrəvan reysi üzrə biletlərin satışına başlayıb. Sözügedən səfərlər üzrə təklif olunan biletlər sistemin saytına yerləşdirilib.

Bakıdan İrəvana ilk reyslər may ayının 14-dən etibarən başlayacaq. Reysləri Macarıstanın “Wizz Air”, Türkiyənin “Turkish Airlines” və Moldovanın “FlyOne” aviaşirkətləri həyata keçirəcək.

Məsələ ilə bağlı “Aviasales”dən “Yeni Sabah”ın sorğusuna cavab olaraq bildirilib ki, İrəvana səfər etmək istəyən Azərbaycan vətəndaşları üçün əlavə məhdudiyyətlər və qaydalar tətbiq olunması istisna deyil:

“Bakı-İrəvan reysləri ilə bağlı bildiririk ki, yalnız biletin alınması kifayət etmir, səfər üçün mütləq etibarlı pasport tələb olunur. Viza məsələsi və digər giriş qaydaları vətəndaşlıqdan asılı olaraq dəyişə bilər. Xüsusilə bu istiqamət üzrə əlavə məhdudiyyətlər və qaydalar tətbiq oluna bilər, buna görə səfərdən öncə rəsmi qurumlardan məlumatın dəqiqləşdirilməsi tövsiyə olunur.

Gediş və dönüş biletlərinin alınması mümkündür. Səfər zamanı və qayıdışda sərhəd nəzarəti həyata keçirilir və pasportun təqdim olunması mütləqdir. Həmçinin əlavə yoxlanışların aparılması ehtimalı mövcuddur”.

Qeyd edək ki, Bakı-İrəvan reysi üzrə ən ucuz biletin qiyməti 216 (“Wizz Air”) , ən bahalı biletin qiyməti isə 595 manat (“Turkish Airlines”) təşkil edir.