Bu cür sərnişin daşınmasına görə cərimə nəzərdə tutulur - AYNA

Sifarişli sərnişin daşınmasının (taksi avtomobilləri ilə sərnişin daşınması istisna olmaqla) formulyar doldurulmadan həyata keçirilməsinə görə 50 manat məbləğində cərimə nəzərdə tutulur.

Avtosfer.az xəbər verir ki, bunu “Report”a açıqlamasında Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyinin (AYNA) İctimai nəqliyyat şöbəsinin müdiri Emin Məcidov bildirib.

Onun sözlərinə görə, daşıyıcılar sifarişli sərnişin daşınmalarını həyata keçirərkən elektron sistemdən istifadə etməklə formulyar doldurmalıdırlar:

“Sürücülərin maarifləndirilməsi istiqamətində AYNA tərəfindən tədbirlər keçirilir. Məqsəd bu sahədə dövlət tənzimlənməsini həyata keçirmək, sahibkarların qanuni maraqlarını qorumaq, şəffaflığı, qanunvericiliyin tələblərinin yerinə yetirilməsini təmin etmək və yeni hazırlanmış elektron sistemdən istifadə vərdişlərini formalaşdırmaqdır”.

O xatırladıb ki, “Qeyri-müntəzəm sərnişin daşınması üçün formulyarın forması”nın təsdiq edilməsi haqqında” Qərar Nazirlər Kabineti tərəfindən 2024-cü il martın 14-də qəbul edilib:

“Sifarişli sərnişin daşınmaları üçün formulyar “AYNA” informasiya sistemində elektron qaydada doldurulduqdan sonra daşıyıcının və sifarişçinin (təşkilatçının) gücləndirilmiş elektron imzası ilə imzalanır. Sifarişli sərnişin daşımaları üçün tərtib edilmiş formulyarda tərtib edilmə tarixi, daşıyıcının və sifarişçinin (təşkilatçının) rekvizitləri, işçi heyəti üzvlərinin soyadları və adları, sərnişinlərin siyahısı, sərnişin avtonəqliyyat vasitəsinin markası və modeli, dövlət qeydiyyat nömrəsi, icazə verilən oturacaqların sayı, sərnişinlərin daşınması marşrutunun sxemi (yola düşmə, təyinat məntəqələri) və digər məlumatlar daxil edilir”.

E.Məcidov deyib ki, sifarişli sərnişin daşımaları yerinə yetirilərkən, müntəzəm marşrutlar üçün müəyyən edilmiş dayanacaqlarda sərnişinlərin mindirilməsinə və düşürülməsinə, müntəzəm marşrutlar üçün müəyyən edilən hərəkət cədvəli, hərəkət sxemi ilə yerinə yetirilməsinə, eləcə də buraxılış kartı və buraxılış vəsiqəsi olmadığına görə də həmin məbləğdə cərimə tətbiq olunur.