Dilqəm Əsgərov 5 il 7 ay saxlanıldığı Şuşa türməsində — FOTOLAR

6 ilə yaxın erməni girovluğunda qalmış, ötən il - 44 günlük müharibədən sonra azadlığa qovuşmuş Dilqəm Əsgərov Şuşa şəhərini ziyarət edib.

Bu barədə Turkustan.az-a açıqlama verən D.Əsgərov bildirib ki, Şuşa şəhərində olmaq onun üçün xüsusi məna daşıyır. Çünki, məhz Şuşa türməsində girov saxlanılıb: "Məni tutanda bir ilə yaxın Xankəndində saxladılar. Sonra qondarma məhkəmə haqqımda "ömürlük həbs" cəzası verəndən sonra məni Şuşa türməsinə apardılar. 5 il 7 ay Şuşa türməsində saxlanıldım".

Heç zaman qələbəyə və azad olunacağına ümidini kəsmədiyini deyən D.Əsgərov Şuşaya səfəri zamanı saxlandığı Şuşa türməsinə də baş çəkib: "İçərisinə girmədim, amma həyətində oldum, çöldən baxdım".

D.Əsgərov işğaldan azad olunmuş ərazilərə səfərində Hadrutda, Cəbrayılda, Laçının Güləbird kəndində də olduğunu bildirdi.