Diqqətli olun! Pulunuzu belə oğurlaya bilərlər - DİN-dən XƏBƏRDARLIQ  

Sosial şəbəkələrdə ölkə rəhbərliyinin adına saxta hesablar açaraq insanları aldadan hesablarla bağlı vətəndaşlarımızın nəzərinə çatdırırıq ki, həmin hesablarda müxtəlif saytların ünvanları ödənişli reklam edilməklə paylaşılır.

Bu barədə Avtosfer.az-a DİN-dən məlumat daxil olub. Bildirilir ki, göstərilən ünvanlara daxil olduqda isə reklam saytlarına yönəldilir və daxil olmaq üçün qeydiyyat və kart məlumatları istənilir. Bu yolla, məlumatlarını daxil edən istifadəçilərin kart məlumatlarının oğurlanmasına cəhdlər olunur.

Bununla əlaqədar, Daxili İşlər Nazirliyi və digər aidiyyəti dövlət qurumları məsələni nəzarətə götürərək araşdırmalara başlayıblar. Daxili İşlər Nazirliyi vətəndaşlarımızı belə saxta hesablara inanmamağa, sosial şəbəkələrdən istifadə edərkən ayıq-sayıq olmağa çağırır.