Elman Nəsirov: “Mənə baxıb dedilər ki, maşına benzini də əyilə-əyilə vurur”

“Vaxtilə mən demişdim ki, erməni əsgəri səngərdə əyilə-əyilə gəzir. Bu söz dillər əzbəri olmuşdu ki, mən erməni əsgərinə söyləyirəm ki, o əyilə-əyilə gəzir.  Məsələ ondadır ki, onlar müasir səngərləri görməyiblər”. 

Ölkə.Az xəbər verir ki, bunu millət vəkili Elman Nəsirov deyib. O bildirib ki, müasir səngərlərdə heç əyilə-əyilə gəzməyə ehtiyac yoxdur:

“Artıq  bunlar 21-ci əsrin səngərləridir. Mən o səngərlərdə gəzmişəm, əsgərlərimizlə görüşmüşəm”. 

E.Nəsirov müharibənin onun sözlərini təsdiqlədiyini söyləyib:

“Hətta sizə bir epizoddan danışım. Bu söhbətin populyar olan bir vaxtı idi. Hər kəs ondan danışırdı. Rayonda avtomobilə benzin vuran zaman iki gənc məni görüb tanıdı. Onlardan biri yanındakına dedi ki, benzini maşına əyilə-əyilə vurur.  Təsəvvür edirsinizmi?
Amma son gülən yaxşı gülər. Mən hətta sonralar fikrimi dəyişdim. Söylədim ki, mən vaxtilə çox yumşaq demişəm. Mən əyilə-əyilə deməməli idim. Deməli idim ki, erməni əsgəri Azərbaycan əsgərinin qarşısında sürünə-sürünə gedir, iməkləyir. Mən belə deməli idim. Həyat da göstərdi ki, vaxtilə mənə gülənlər, fikrimi istehza ilə qarşılayanlar gördülər ki, necə həqiqəti demişəm”.