"Metro City"dəki yanğın nədən başladı: qısaqapanma, yoxsa qəsd? - Zərərçəkənlər DANIŞDI - FOTO

Bu gün səhər saatlarında Nəriman Nərimanov metrostansiyasının yaxınlığında yerləşən "Metro City" ticarət mərkəzində və onun ətrafında güclü yanğın qeydə alınıb.

Avtosfer.az xəbər verir ki, Publika.az-ın hadisə yerində olan əməkdaşının verdiyi məlumata görə, zərərçəkənlər yanğının qəfildən başladığını bildirib.

Yanğının qısaqapanmadan baş verdiyi ehtimal olunur.

Zərərçəkənlər isə yanğının qısaqapanmadan baş verməsinə inanmırlar. Onların sözlərinə görə, gecə işıqların hamısı "rubilnik"dən söndürülür. Onların sözlərinə görə, yanğın nəticəsində 40-50 arası mağaza yanaraq külə dönüb.

Uşaq paltarları satan zərərçəkmiş Gülzarə Eyvazova isə bildirib ki, 60 mindən çox dəyəri olan məhsula zərər dəyib. O bildirib ki, mağazada ancaq uşaq geyimləri olub: "Hamısı nisyə götürülmüşdü. Hər şeyimiz yanıb kül oldu. Mağazadan dünən axşam cəmi 700 manat pul götürə bilmişəm. Pullar adətən mağazada qalırdı, dünən pulu götürdüm. Elə bil ürəyimə dammışdı.

Gecəni narahatlıqdan yata bilmirdim. Səhər də bu hadisə oldu. Biz də yanğından sonra xəbər tutduq. Buranın müdiri Füzuli müəllim yoxa çıxıb. Onu axtarıram, tapa bilmirəm. Ancaq yerpulu almağı bilirlər, amma mallarımızı qoruya bilmədilər".

Zərərçəkən Ramin Məmmədov isə bildirib ki, ona təxminən 35 min manata yaxın ziyan dəyib:

"Kişi geyimləri satırdıq. Yanğın vaxtı burada deyildik. Binə Ticarət Mərkəzinə mal gətirməyə getmişdik. Hər şey külə döndü. İkitərəfli ticarət mərkəzi idi. Heç nə çıxarmaq mümkün olmadı. Biz də indi çatmışıq".