Ötən il Çağrı Mərkəzi 832 961 müraciəti cavablandırıb - ADSEA

Azərbaycan Dövlət Su Ehtiyatları Agentliyinin (ADSEA) 955 Çağrı Mərkəzi vətəndaşların şikayət və müraciətlərinin operativ şəkildə qəbul edilməsi və müvafiq tədbirlərin görülməsi məqsədilə sutka ərzində fasiləsiz fəaliyyət göstərir.

Bu barədə Avtosfer.az-a ADSEA-dan bildirilib.

Məlumata görə, Agentliyin vahid sistemi üzrə fəaliyyət göstərən Çağrı Mərkəzi müraciətləri canlı rejimdə, səsli mesaj və geriyə zəng sifarişi vasitəsilə qəbul edir. Vaxt məhdudiyyəti və ya xətdə gözləmək imkanı olmadıqda vətəndaşlar “səsli mesaj” və ya “geriyə zəng sifarişi” xidmətlərini seçə bilirlər. Gün ərzində həmin vətəndaşlara geriyə zəng edilir. Müraciətlər dinlənilir, sorğu tipli müraciətlər birbaşa cavablandırılır, araşdırma tələb edən məsələlər isə qeydiyyata alınaraq “Müraciət vərəqəsi” tərtib edilir və aidiyyəti üzrə araşdırmaya göndərilir.

Bundan əlavə, digər platformalar (onlayn çat, sosial şəbəkələr, WhatsApp) vasitəsilə daxil olan sorğu tipli müraciətlər də operativ şəkildə cavablandırılır.

2025-ci il ərzində 955 Çağrı Mərkəzi tərəfindən 832 961 müraciət cavablandırılıb. Cavablandırılan zənglərdən 492 993-ü (55%) araşdırmaya ehtiyac olmadan birbaşa cavablandırılıb, 297 538 zəng (33%) əsasında iş əmri yaradılıb, 42 430 müraciət (5%) isə sorğu xarakterli olub.

İş əmri yaradılan 297 538 zəngin 238 870-i həllini tapıb (80%), 58 668-nə (20%) isə müvafiq izahat verilib.