Zibi maşını ağır qəzaya səbəb oldu; yaralı var

Bakının Nərimanov rayonu ərazisində xəsarətlə nəticələnən yol-nəqliyyat hadisəsi baş verib. APA-nın məlumatına görə, qəza Heydər Əliyev prospektində qeydə alınıb. Prospektlə "Koroğlu" metro stansiyası istiqamətində yüksək sürətlə hərəkət edən "Lexus" markalı avtomobil Bakı Şəhər İcra Hakimiyyətin məxsus olan və məişət tullantıları daşıyan "MAN" markalı yük maşınına arxadan çırpılıb. Qəza nəticəsində "Lexus"un sürücüsü 26 yaşlı Həsənov Taleh Azad oğlu xəsarət alıb və xəstəxanaya aparılıb. Avtomobil isə yararsız vəziyyətə düşüb.

"Lexus"un mühərrik hissəsində tüstülənmə baş verdiyindən əraziyə FHN-in Dövlət Yanğından Mühafizə Xidmətinin iki yanğınsöndürmə briqadası cəlb edilib. Yanğınsöndürənlər yanğın təhlükəsinin qarşısını alıblar. Faktla bağlı Nərimanov Rayon Polis İdarəsində araşdırma aparılır.