Gölməçənin altında gizlənən təhlükə: Gündə 20-30 avtomobil bu çuxura düşür - VİDEO

Paytaxtın Binəqədi rayonu, Binəqədi qəsəbəsi, Nicat Mustafayev küçəsində yaranmış dərin çökəklik sürücülər üçün ciddi təhlükə yaradır.

Avtosfer.az-ın məlumatına görə, sözügedən problemlə bağlı sakinlərdən biri ərazidəki vəziyyəti videoya çəkərək sosial şəbəkədə paylaşıb.

Kadrlardan görünür ki, yolun asfalt örtüyü aşınıb, nəticədə dərin çökəklik əmələ gəlib. Çuxur yağış və ya gölməçə suyu ilə dolduğundan onun dərinliyini müəyyən etmək mümkün olmur. Bu səbəbdən ərazidən ilk dəfə keçən sürücülər təhlükəni əvvəlcədən görməyərək avtomobillərini çuxura salırlar. Videodan həmçinin görünür ki, çökəkliyin içərisində daş da var ki, bu da nəqliyyat vasitələrinə ziyan vurmaq riskini daha da artırır.

Şikayətçinin sözlərinə görə, gün ərzində təxminən 20-30 avtomobil həmin çuxura düşərək maddi ziyan görür.

Sakin bildirib ki, şəhid Nicat Mustafayevin adını daşıyan küçə uzun müddətdir bu vəziyyətdədir. Onun iddiasına görə, problemə baxmayaraq, indiyədək aidiyyəti qurumlar tərəfindən ərazidə hər hansı təmir-bərpa işləri aparılmayıb.

Qeyd edək ki, yolda yaranmış bu cür çökəkliklər həm nəqliyyat vasitələrinə maddi ziyan vurur, həm də yol-nəqliyyat hadisələrinin baş vermə riskini artırır.

Nərmin