İşıqforu gözardı edərək yolu keçən qadın övladını da təhlükəyə atdı - VİDEO

Paytaxtın Nərimanov rayonu, Olimpiya küçəsində piyadaların yol hərəkəti qaydalarını pozması kameraya düşüb.

Avtosfer.az-ın məlumatına görə, hadisə bir neçə gün əvvəl günorta saatlarında qeydə alınıb. Görüntülərdən məlum olur ki, piyadalar işıqforun qadağanedici işığına məhəl qoymadan nizamlanan piyada keçidindən istifadə edirlər. Onlardan biri olan qadın piyada isə ətrafa diqqət etmədən, yaxınlaşan nəqliyyat vasitəsini nəzərə almadan yolu keçməyə çalışır. Daha təhlükəli məqam isə onun azyaşlı övladı ilə birlikdə hərəkət etməsidir.

Sürücünün keçidə yaxınlaşarkən sürəti azaltması və ehtiyatlı davranması baş verəcək təhlükənin qarşısını alıb.

Qeyd edək ki, bəzi piyadalar nizamlanan keçidlərdən istifadə etsələr də, işıqforun tələblərinə əməl etmirlər. Halbuki belə keçidlərdə yolu yalnız nəqliyyat vasitələri üçün qırmızı işıq yandıqda keçmək olar. Əks halda piyada həm inzibati məsuliyyət daşıyır, həm də öz həyatını təhlükə altına atmış olur.

Bir sözlə, piyadalar istər nizamlanan, istərsə də nizamlanmayan keçidlərdə yolu keçməzdən əvvəl mütləq hərəkət intensivliyini qiymətləndirməli, yaxınlaşan avtomobillərin dayandığına əmin olduqdan sonra hərəkətə başlamalıdırlar.

Nərmin