Ramil Mənsimov Azərbaycana gətirildi

Beynəlxalq axtarışda olan şəxs Monteneqroda tutularaq Azərbaycana ekstradisiya edilib. Avtosfer.az-a bu barədə Ədliyyə Nazirliyindən məlumat verilib.

Bildirilib ki, martın 18-də İnterpolun Azərbaycandakı Milli Mərkəzi Bürosu beynəlxalq axtarışa verilən və yeri müəyyən edilən daha bir şəxsin Azərbaycana ekstradisiyası baş tutub.

2020-2022-ci illərdə “Aqrar İnnovasiya və Təchizat şirkəti” ASC-nin Salyan rayonunda yerləşən anbarında işlədiyi müddət ərzində qulluq mövqeyindən istifadə etməklə ona etibar edilmiş əmlakı mənimsəməkdə (Azərbaycanın Cinayət Məcəlləsinin 179.2.3 və 179.2.4-cü maddələri) ittiham edilən Azərbaycan vətəndaşı Mənsimov Ramil Yaqub oğlunun yeri Monteneqroda müəyyən olunub və o, həbs edilib.

Baş Prokurorluğun sorğusu və beynəlxalq prosedurlara uyğun tələb olunan sənədlərin təqdimatından, habelə aparılan danışıqlardan sonra həmin şəxsin ölkəmizə ekstradisiyası ilə bağlı razılıq əldə olunub. Bu da öz növbəsində ölkəmizin beynəlxalq aləmdə mövcud olan nüfuzunu və Monteneqronun ölkəmiz üçün etibarlı tərəfdaş olmasını bir daha təsdiq edir.

Monteneqrodan ölkəmizə birbaşa reys olmadığından Ədliyyə Nazirliyi Türkiyənin səlahiyyətli orqanları ilə danışıqlar apararaq, tranzit icazəsi alınıb və Mənsimov Ramil Yaqub oğlunu nazirliyin Beynəlxalq əməkdaşlıq baş idarəsinin və Penitensiar xidmətinin məsul əməkdaşları Monteneqrodan ölkəmizə gətirərək məhkəmənin həbs qərarına əsasən müvafiq istintaq təcridxanasına yerləşdirib.