Bakıda kirayə mənzil tapmaq İMKANSIZLAŞIR – Yay aylarında qiymətlər niyə ucuzlaşmır? - VİDEO

Tələbələr yay tətilində şəhərdə olmasalar belə, sentyabrda münasib qiymətə mənzil tapmaq çətinləşdiyi üçün kirayə haqqı ödəməyə davam edirlər.

Avtosfer.az xəbər verir ki, tələbələrin sözlərinə görə, sentyabr ayında tələbatın artması mənzil tapmağı çətinləşdirir və qiymətlərin yüksəlməsinə səbəb olur. Buna görə də bəzi tələbələr üç ay evdə yaşamasa belə, mənzili başqasına verməmək üçün kirayə haqqını ödəyir.

Mütəxəssislər bildirirlər ki, ucuz kirayə mənzillərin azalması, köhnə tikililərin sökülməsi və yeni binalarda qiymətlərin yüksək olması bazara təsir göstərir. Onların fikrincə, keçmiş tələbə yataqxanalarının yenidən qurulması mənzil probleminin həllinə və kirayə qiymətlərinin sabitləşməsinə kömək edə bilər. Hazırda paytaxtın mərkəzi və mərkəzə yaxın ərazilərində köhnə tikililərdə birotaqlı mənzillərin aylıq kirayəsi 400 manatdan başlayır.