Tıxac üçün hazırlanmış qeyri-adi maşın: Bir düymə ilə 2,7 metr hündürlüyə qalxır – FOTO

Tıxacda saatlarla gözləmək əvəzinə qarşıdakı avtomobillərin üzərindən keçə bilən qeyri-adi SUV dizaynı ilə diqqət çəkir. Bir düymə ilə bir neçə metr yüksələ bilən avtomobil xüsusi hidravlik sistemi və kameraları ilə fərqlənir.

Avtosfer.az xəbər verir ki, “Supercar Blondie”nin yaydığı məlumata görə, “Hum Rider” adlı bu qeyri-adi avtomobil 2017-ci ildə “Jeep Grand Cherokee” əsasında hazırlanıb. Avtomobil tıxacda digər nəqliyyat vasitələrinin arasından keçmək əvəzinə, onların üzərindən hərəkət edə biləcək formada dizayn olunub.

“Hum Rider”in ən diqqətçəkən xüsusiyyəti kuzovu təxminən 2,7 metr hündürlüyə qaldıra bilən hidravlik asqı sistemidir. Düyməyə basıldıqda avtomobilin alt hissəsindən hidravlik qollar çıxır, təkərlər yanlara doğru açılır və kuzov yuxarı qalxır.

Sistem eyni zamanda avtomobilin təkərlərarası məsafəsinin genişlənməsinə imkan verir. Adi hərəkət rejiminə keçildikdə isə hidravlik mexanizm yenidən yığılır və avtomobil daha alçaq vəziyyətə qayıdır.

Qeyri-adi mexanizmin işləməsi üçün avtomobildə ümumilikdə 90 metrdən çox hidravlik borudan istifadə olunub. Sistem üçün lazım olan enerjini isə “Honda” markalı benzin generatoru təmin edir.

Avtomobildə aparılan genişmiqyaslı dəyişikliklər onun çəkisinin də əhəmiyyətli dərəcədə artmasına səbəb olub. “Hum Rider”in boş çəkisi təxminən 3 850 kiloqrama çatır. Bu göstərici standart “Jeep Grand Cherokee”nin çəkisindən iki dəfədən çoxdur.

Artan çəki və hidravlik sistemin yaratdığı əlavə yükü qarşılamaq üçün SUV-də ağır texnika üçün nəzərdə tutulan xüsusi yük avtomobili təkərlərindən də istifadə edilib.

Avtomobil qaldırıldıqda sürücünün görmə imkanları ilə bağlı problem yaranır. Kuzov yuxarı qalxdığı zaman sürücü avtomobilin altındakı və yaxın ətrafındakı ərazini pəncərədən birbaşa görə bilmir.

Bu problemi həll etmək üçün “Hum Rider”ə avtomobilin alt hissəsini izləyən dörd kamera quraşdırılıb. Kameralardan alınan görüntülər salondakı ekranlara ötürülür. Bunun sayəsində sürücü avtomobil qaldırılmış vəziyyətdə olarkən onun ətrafında və altında baş verənləri ekran vasitəsilə izləyə bilir.

“Hum Rider” kütləvi istehsal üçün nəzərdə tutulmayıb. Avtomobil 2017-ci ildə “Verizon” şirkətinin “Hum” adlı bağlantılı avtomobil xidmətinin tanıdılması məqsədilə xüsusi nümayiş vasitəsi kimi hazırlanıb.

Qeyri-adi avtomobildən cəmi bir ədəd istehsal edilib.

Eltac Zülfüqaroğlu