Tərtərdə ermənilərin raket hücumundan ziyan görmüş ev təmir edilmir? - VİDEO

Tərtərdə evin divarlarında əyilmələr yaranıb, tavanında  çatlar əmələ gəlib.

Avtosfer.az xəbər verir ki, 44 günlük Vətən müharibəsində Ermənistan silahlı qüvvələri Tərtər rayonunun Düyərli kəndini ağır atıcı silahlardan və raketlərdən atəşə tutması nəticəsində insanların mülkiyyətinə və evlərinə xeyli ziyan dəyib. Qəzalı vəziyyətə düşən evlərdən biri də Abuzərovlar ailəsinə aiddir. Düşmən ordusu kəndi atəşə tutan zaman bir neçə top və qrat mərmisi fərdi yaşayış evinin yaxınlığına düşüb. Nəticədə bir mərtəbəli, iki otaqlı evin hasarlarında çat və əyilmə yaranıb. Evin dam örtüyü isə yararsız vəziyyətə düşüb. Abuzərovlar ailəsi evin yenidən əsaslı bərpası ilə bağlı rayon icra hakimiyyətinə dəfələrlə müraciət etdiklərini deyir. Məsələ ilə bağlı Tərtər Rayon İcra Hakimiyyətindən bildirilib ki, Nazirlər Kabinetinin tapşırığına əsasən, ayrılmış komissiya müharibədən sonra evə baxış keçirib və dəymiş ziyanın miqdarı hesablanıb. Ev sahibinə 1000 manat nağd pul və müəyyən tikinti materialları təqdim edilib. Bu isə təmir işinin aparılması üçün kifayət edir.