Binəqədidə təhlükəli anlar: “VAZ”ın damından uçan yüklər arxadakı maşına dəydi - VİDEO

Binəqədi yolunda qayda pozan sürücü qəza təhlükəsi yaradıb.

Avtosfer.az-ın məlumatına görə, hadisə bir müddət əvvəl səhər saatlarında qeydə alınıb. Belə ki, “VAZ-21011” markalı avtomobilin sürücüsü dam hissəsində müxtəlif yüklər daşıyıb. Lakin yüklər nə xüsusi baqaj qurğusuna yerləşdirilib, nə də lazımi qaydada bərkidilib.

Kadrlarda görünür ki, avtomobil hərəkətdə olarkən sol tərəfdən “Toyota Prado” markalı nəqliyyat vasitəsi ötür. Həmin an küləyin təsiri ilə “VAZ”ın damında yerləşdirilən yüklərin bir hissəsi yerindən qoparaq arxadan gələn avtomobilə dəyir, bir neçə parça isə yolun hərəkət hissəsinə səpələnir. Bu vəziyyət arxadan gələn sürücü üçün təhlükəli hal yaratsa da, xoşbəxtlikdən qəza baş verməyib.

Qeyd edək ki, yol hərəkəti qaydalarına əsasən, nəqliyyat vasitəsində daşınan yük elə yerləşdirilməli və bərkidilməlidir ki, hərəkət zamanı yerindən tərpənərək yola düşməsin, digər nəqliyyat vasitələri üçün maneə və təhlükə yaratmasın. Videoda görünən halda isə sürücünün yükü nə dam qurğusuna düzgün yerləşdirdiyi, nə də etibarlı şəkildə bərkitdiyi müşahidə olunur ki, bu da yolda hərəkət edən digər sürücülər üçün real risk yaradır. 

Nərmin