Bələdiyyədən hərrac yolu ilə alınan torpaqlar başqasına necə satılmalıdır? – HÜQUQŞÜNAS AÇIQLADI - FOTO

Son illərdə bələdiyyələrin hərrac vasitəsilə torpaq satışına maraq artıb.
Avtosfer.az xəbər verir ki, bu yolla torpaq sahibi olan vətəndaşlar isə yeni qanun dəyişikliyindən sonra gözlənilməz məhdudiyyətlə üzləşiblər. Belə torpaq sahələri 5 il müddətinə satışa çıxarıla bilmir. Amma bu məhdudiyyətlər fonunda insanlar arasında başqa bir sual gündəmə gəlib: torpağın mülkiyyətini rəsmi şəkildə satmaq mümkün deyilsə, onu etibarnamə ilə başqasına vermək olar, ya yox?
Bir tərəfdən qanun alqı-satqıya sərt qadağa qoyur, digər tərəfdən isə gündəlik praktikada etibarnamə ilə mülkiyyət hüququnun faktiki şəkildə ötürülməsi halları müşahidə olunur. Belə vəziyyətdə vətəndaşlar çaşqınlıq içindədir: qanunvericilik bu məsələyə necə yanaşır və prosedur hansı qaydada tənzimlənir?

Məsələ ilə bağlı hüquqşunas Ramil Süleymanov saytımıza açıqlamasında bildirib ki, bələdiyyələr tərəfindən hərrac yolu ilə satılan torpaqların 5 il müddətinə yenidən satışa çıxarılmasının qadağan olunması qanunun tələbidir:
“Əgər vətəndaşlar bir-birilə etibarnamə əsasında alqı-satqı həyata keçirsələr, bilməlidirlər ki, etibarnamə alqı-satqı sənədi hesab olunmur və bu ciddi risklər yaradır. Ən böyük risk isə ondan ibarətdir ki, etibarnamə verən şəxs istənilən vaxt həmin sənədi ləğv etmək səlahiyyətinə malikdir.
Bu halda etibarnamə ilə torpaq alan şəxs gələcəkdə uzun müddət istintaq orqanlarında və məhkəmələrdə vaxt itkisi ilə üzləşə bilər”. 
Hüquqşunas qeyd edib ki, ilkin notarional alqı-satqı müqaviləsi bağlanılması mütləq şəkildə tövsiyə olunur:
“Beş illik müddət başa çatdıqdan sonra torpaq rəsmi qaydada şəxsin adına keçirilməli, yalnız bundan sonra həmin torpağın alqı-satqısı həyata keçirilməlidir”.

Fidan